Jen via ŝanco partopreni FESTOn senpage kiel muzikisto aŭ muzikŝatanto!

Ĉu vi aĝas malpli ol 30, ĉu vi ludas aŭ kantas (amatore aŭ duonprofesie), ŝatas muzikumi, volas pluspertiĝi pri muziko kaj pasigi semajnon kun aliaj muzikŝatantoj? Partoprenu FESTOn kaj ĝuu mirindan muzikan etoson en Esperantujo! 

FESTO ricevis subvencion el FraGeJo (Franc-Germana Junulara Oficejo – OFAJ – DFJW) por venigi franc- kaj germanloĝantojn al FESTO kaj partopreni en tre muzikema projekto!

Kiel partoprenanto, vi havos la ŝancon ricevi trejnadon pri DĴ-umado, soninĝenierado, muzikeldonado, ĥoruso kaj instrumentmuzikumado (piano, gitaro ktp) el profesie spertaj junuloj kaj famaj esperantaj muzikistoj kiel Platano, Flo kaj Gijom.
Vi estos gvidita de ili por krei novajn kantojn en Esperanto kaj muzikumi por spertiĝi grupe. Je la fino de la semajno, ĉiuj partoprenantoj havos la eblon koncerti sur la granda scenejo!

Se tiu projekto interesas vin, nepre proponu vian kandidatiĝon!

Kontraŭ partopreno en la projekto kaj surloka deĵorado kiel helpanto, vi ricevos senpagan aliĝon al FESTO (loĝadon, veganajn manĝojn kaj programkotizon) de la 17-a ĝis la 24-a de aŭgusto 2025.

Se vi havas demandojn, alskribu nin al info@esperanto-jeunes.org aŭ per Telegramo!

Ĉu vi volas partopreni mojosan festivalon en Sudfrancio kaj ĝui buntan muzikan programon? Ĉu vi volas esperantumi dum tuta semajno kaj festumi ĝis la nokto, nokto fin’? Ĉu vi ne povas vojaĝi ĝis Indonezio por partopreni la IJK-n? Venu al FESTO!

Post pli ol dekjarlonga paŭzo, FESTO revenas. Ĝi okazos de la 17-a ĝis la 24-a de aŭgusto en Moissac, Francio. Ĝin organizas la Junulara Esperanta Franca Organizo (JEFO) kun muzika programo aranĝita kun EUROKKA. Sekvu niajn progresojn kaj la informojn ĉi tie kaj Telegrame!

FESTO okazos en la metilernejo en la bela urbeto Moissac, proksime de Tuluzo. Koncertoj, naĝejo, somera etoso, ĉu vi bezonas pli?

La aliĝilo jam pretas! Vi havos apartan rabaton se vi aliĝas antaŭ la fino de la Junulara E-Semajno (JES). Ne maltrafu vian ŝancon!